BrainStorm

يريد الله أن يخفف عنكم و خلق الإنسان ضعيفا

هي جت عليا -2!!

السلام عليكم و رحمة الله وبركاته

ياااه الواحد مش لاقي كتاب النيورو..مهو لو الواحد بيسيب الحاجة في مكانها

يا ألف نهار أبيض نورتونا و انستونا..معلش الدنيا مكركبة عشان الامتحانات شوية

طيب أولا اسمحولي أتكلم عن سبب إنشاء المدونة دي

بص يا سيدي اسند ضهرك و اسمعني

أولا دي مش مدونتي الاولى..عندي مدونة تانية عملتها من 4 سنين تقريبا  هي حاليا مختفية في غياهب  العالم السايبري المترامي الأطراف..متتعبش نفسك و تدور عليها..ديه بتلعب دور منفذ الضغط..حاجة زي مذكرات خاصة ليا كدة..لأنه مش كل شيء يقال على الملأ كدة..بس أحيانا لازم نحس أننا بنفضفض..حتى لو لنفسنا..معلش أنا عارف أن الموضوع تخيله معقد

طب ليه عملت المدونة دي بقى؟

صلي على النبي

بص يا سيدي

المدونة دي عشان خاطري أنا أولا و عشان خاطر الناس ثانيا

عشان خاطر الناس تفهم ازاي واحد متدين أو بيسعى للالتزام بيفكر ..

أكيد أنت و أنت ماشي في الشارع و حاطط سماعة المسجل أو الم بي ثري في ودنك و يعدي عليك واحد..بالبلدي كدة شيخ-مبحبش الكلمة دي على فكرة- معدي جنبك بتفكر في حاجات كتير..هو بيفكر ازاي؟ حياته شكلها إيه؟ طب لو مبيسمعشي موسيقى بيعمل إيه في يومه يعني؟

مين اللي بيسمع لهم ولا بيقرالهم ؟ هو بيشتغل ولا قاعد في المسجد ليل نهار..هو متشدد ولا بيهزر زينا؟ بيلعب كورة لا لأ؟

أوعدك أني أنا نفسي معرفشي أوي الاجابات عن الأسئلة دي بس عموما هحاول أنقلك أفكاري بما أنني يطلق علي لقب شيخ بس هنقلك برضه أفكار الناس اللي أحسبهم محترمين ولا أزكي على الله أحدا و ايه أفكارهم و نمط حياتهم ..

على فكرة هما شباب عادي جدا و مفيش فرق بينكم و هوريك إن شاء الله من خلال مواقف كثيرة

ثانيا اهمية المدونة دي بالنسبة لي تتلخص في كام كلمة قالهم أحد الدكاترة اللي سعدت باني تتلمذت على إيده الله يكرمه ..كام كلمة مؤثرة علمتني أن الانسان و هوصغير بيبقى في دماغه أفكار كتيرة مثالية و أخلاق عالية ..

و كل لما يكبر بيرخي الحبل سنة بسنة امام شد المسئوليات و متاعب العمل و الروتين و رخصة السواقة و كل سنة و أنت طيب يا بيه و..

لحد ما يكبر و يبقى راجل عرة(احم دا مش تعبيري بس هو تعبير دقيق جدا)

و لما حد يفكره بأفكاره المثالية و هو صغير و ليه ما التزمشي بيها يرد يقول :

“كنت صغير و أهبل و مش فاهم !!!”

بس الحقيقة انه الصح عمره ما يتغير سواء كبرت سنة أو اتنين أو عشرة..الصح صح و الغلط غلط..

فالمدونة دي كدة ممكن تعتبرها إنقاذ ما يمكن إنقاذه عشان الواحد لما يكبر إن شاء الله و يصلع و يكرش في يوم يقعد أمام الكمبيوتر-لو لسة فيه كمبيوترات وقتها – و يقرا الكلام دا و هو كان نفسه يبقى إيه

يحس على دمه شوية و يرجع لنفسه

طيب

البوست الجاي إن شاء الله

FAQ

أسئلة متكررة بخصوص المدونة

طبعا أنا اللي هسئلها لنفسي لان الديمقراطية لا مجال لها هنا

إلى لقاء

السلام عليكم و رحمة الله و بركاته

Advertisements

2 responses to “هي جت عليا -2!!

  1. Egyptian Eagle October 29, 2010 at 8:04 pm

    بص يا حاج رفعت أنا مش عارف أنا قرأت كم واحدة
    أصل أنا بصراحة لسه قارئهم دلوقتى كلهم ورا بعض
    بس بصرف النظر
    وبصراحة أسلوبك ممتع
    وأكتر حتة عجبتنى وأجبرتنى إنى لازم أكومنت
    هى دى لأنها حقيقة فعلا

    أهمية المدونة دي بالنسبة لي تتلخص في كام كلمة قالهم أحد الدكاترة اللي سعدت باني تتلمذت على إيده الله يكرمه ..كام كلمة مؤثرة علمتني أن الانسان و هوصغير بيبقى في دماغه أفكار كتيرة مثالية و أخلاق عالية ..
    و كل لما يكبر بيرخي الحبل سنة بسنة امام شد المسئوليات و متاعب العمل و الروتين و رخصة السواقة و كل سنة و أنت طيب يا بيه و..
    لحد ما يكبر و يبقى راجل عرة(احم دا مش تعبيري بس هو تعبير دقيق جدا)
    و لما حد يفكره بأفكاره المثالية و هو صغير و ليه ما التزمشي بيها يرد يقول :
    “كنت صغير و أهبل و مش فاهم !!!”
    بس الحقيقة انه الصح عمره ما يتغير سواء كبرت سنة أو اتنين أو عشرة..الصح صح و الغلط غلط

    • ref3atov October 30, 2010 at 3:46 am

      الله يكرمك يا سيدي

      فعلا الصح عمره ما هيتغير بس احنا اللي بنحب نبرر لنفسنا

      و كمان مشكلتنا أننا بنبص لنفسنا و اللي حوالينا و نقلدهم و نبرر أفعالنا بان المجتمع كله بيعمل كدة

      بنقتدي بالناس اللي زينا في أفعالنا و دي الحقيقة للأسف

      برضه هبقى اتكلم عن النفطة دي إن شاء الله باستفاضة شوية من كلام الدكتور الله يكرمه

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: