BrainStorm

يريد الله أن يخفف عنكم و خلق الإنسان ضعيفا

21- ما تبصليش بعين رضية

السلام عليكم و رحمة الله و بركاته

ريح يا بني عالشيزلونج و احكي

الاسم :د\ مش هتفرق أوي

السن : 24 عاما

المهنة:عاطل..لحد ما استلم الامتياز إن شاء الله..ساعتها هيبقى العاطل بيقبض أكثر مني بدل بطالة

الحالة الاجتماعية : يمكنك أن تخمن

السكن: عند أبويا و امي ربنا يديهم الصحة …أو ممكن نايم في أوضة النواب أو في الطواريء

المؤهل:المفروض بكالوريوس طب و جراحة..بس مش هستلم شهادة التخرج دلوقتي..

-مشكلتك إيه يا بو الشباب؟

لا دي قصة طويلة شوية..بدأت من كي جي وان..أبويا و أمي دكاترة..فتوقع لي الكثيرون النبوغ الذي هو – من وجهة نظرهم – الالتحاق بكلية الطب

– و بعدين؟

ما كدبتش خبر ..ذاكرت في ابتدائي و اعدادي..و ثانوي..جبت مجموع في ثانوي الحمدلله يؤهلني لدخول كليات القمة كما يكتبون في بريد الأهرام..لكن واضح أنه معنى أنك جبت مجموع يؤهلك لدخول كليات القمة يبقى مش بالضرورة أنك تخش كليات القمة..بس أهه اللي حصل بقى الحمدلله

– طيب

– ..ذاكرت في كليات القمة و استكملت مسلسل الدروس الخصوصية لحد ما أنهيت كلية الطب و لله الحمد

و برضه بمجموع كويس يؤهلني لالتحاق بهيئة التدريس مع وجود ملامح اضطرابات حول هذه النقطة في الأفق نظرا لظروف ادارية يصعب شرحها و ربنا يستر

– كل دا كلام جميل..

– اه فعلا..لحد ما تخلص و تنوي تتزوج

أول ما تنوي تتزوج هتكتشف التناقضات العجيبة اللي كنت بتسمع عنها و مطنشها..أنت متخرج عندك 24 سنة و أصحابك  في الكليات التانية اتخرجوا من سنتين

..أنت متخرج و هتقعد سنة ما بتقبضش مرتب و ملزم بالتدريب فيها..أصحابك بيبعتوا سي فيهاتهم و يشتغلوا ..

أنت متخرج عشان تتدرب و مش هتتدرب و هتقضيها مشاوير و أصحابك ممكن يقعدوا في شركة ست أشهر تحت التدريب بعدين يتثبتوا..

أنت معندكش شقة و هما كمان معندهمش..انت صعب تجيب شقة لكن هما بيقبضوا مرتب و ممكن يجيبوا شقة..

يوم ما تتعين في الجامعة نائب – أمل الأطباء الأكبر- هتقبض 1000 جنيه في الشهر لو قضيتها نوبتجيات من غير ما تروح بيتكم..أصحابك بيقبضوا ألفين جنيه تقريبا

أنت شغال في عنبر مع مرضى شفاهم الله و الشغل صبح و ليل بتركب ابر و كانيولات و قساطر و ممكن تمرض زيهم ..أصحابك بيشتغلوا في مكتب مكيف و لابسين بدلة

أنت بتقعد عالحال دي خمس سنين يعني لحد ما تبقى 30 سنة تقريبا..هما ممكن خلال السنين دي يترقوا في شغلهم..

يوم ما تروح تتجوز انت ما معكش غير لقبك و الذي لن يغني عنك شيئا أمام أهل العروسة و أصحابك عندهم شقة و عربية و عمل بدخل ثابت..

أصحابك بيشتكوا من تعنت المدراء و انت بستحمل بهدلة الأساتذة و لسانهم الطويل و أنت ساكت..

حتى لما تشتغل كويس و تقبض تلاقي الناس بتتهمك باالتربح من رزق المرضى الفقراء و تترصد أخطائك المهنية – في الحقيقة النقطة دي ممكن تكون صحيحة فعلا- أصحابك يوم ما يغلطوا في شغلهم بتبقى أخطائهم مش بذات الفداحة

أصحابك اهلهم بيلحوا عليهم للزواج و هما نفسهم يكونوا قرشين الأول..انت بتلح على أهلك للزواج و أهلك شايفين الاولى انك تكمل شهاداتك و دراساتك التي لا تنتهي كما يبدو

في النهاية قد يتأخر مشروع زواجك لأجل غير مسمى فتنخرط في العلم حتى تنسى نفسك و تستفيق بعد سن ال30 لتجد أقرانك قد تزوجوا و أنجبوا و ترقوا في مناصبهم أيضا

طب إيه اللي ضربك على إيدك و قاللك ادخل طب؟

يعني هي المشكلة في الطب ولا في بلدنا؟ مش دا اللي بيحصل برة مصر..ولا يصح ان مهنة كريمة زي الطب يلاقي أبناءها كل هذا الظلم

أنا غير نادم على اختياري لهذه المهنة العظيمة و اسأل الله أن يرفعنا بها درجات في الدنيا و الاخرة و ان نكون سببا في تخفيف الام المرضى و أن نكون رحماء بهم و ألا تدفعنا تلك الظروف لامتصاص قوت يوم الفقراء حينما نكبر

اسأل الله ان يوفقنا في حياتنا و زواجنا و أن يرزقنا زوجة صالحة و ان ييسر لنا أمورنا كلها و يرزقنا من حيث لا نحتسب

اسأل الله أن يرزقنا بر والدينا و رضاهما

اسأل الله أن يقبضنا إليه غير مفتونين

اسأل الله أن يرزقنا الخير في بلادنا ولا نضطر للهجرة إلى بلاد باردة بعيدا عن أهلنا..و ديننا

 

****

غفر الله لنا و لكم

.

 

Advertisements

2 responses to “21- ما تبصليش بعين رضية

  1. Dr.M.ReDa February 24, 2011 at 7:33 pm

    بجد يا محمد مش عارف أضحك ولا أبكي

    بس أنت نسيت الجيش

    ^_____________________^

    لو أضفناه للمعادلة المستحيلة اللي فوق دي

    هتبقى كوميديا سودااااااااااء

    لكن كل اللي بنقوله

    يارب

    يارب

    يارب

    يارب الوضع يتحسن يارب الوضع يتغير

    وربنا يتقبل مننا كلنا

    ^_^

  2. ref3atov February 26, 2011 at 8:30 am

    ربنا يكرمك يا رضا

    دي مش تدوينة أوي..دي تعتبر فضفضة

    الجيش إن شاء الله ليا تأجيل ربنا يكرم و تتم بإعفاء

    ربنا يكرمنا و يجازينا خيرا على نوايانا الحسنة..

    و يكرمك يا صاحبي عالرد
    *___^

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: